SUKSMAN PADU RAKSA

 Pewangunan jero utawi umah ring jagat Bali kesayawyaktyannyane wantah mebinayan ring pewangunan umah ring genah siosan ,dwaning manut lontar Siwa Gama, kesinahang mungda sabilang umah genah urip umat Hindu ring Bali ugi mangda kewangun Merajan Kamulan pinaka huluning karang paumahan . Punika taaler ring Lonatar Purwa Gumi Kamulan kasinahang Merajan Kamulan punika waluya palinggih genah  ngelinggihang Sang Dewa Pitara,minekadi Bhetara Hyang Guru. punika taler yen ring natar paumahan rikala ngemargiang Upacara Rsi Gana,ketah kemargiang pula pali nanem banten Rsi Gana ring natar paumahan. Kawentenan banten Rsi Gana ketanem ring natar paumahan waluya niyasa  panulak wiguna sane miambeng kahuripan, sane landuh tur bagia. Manut Yajur Weda,karang paumahan punika waluya niyasa bhuwana genah Ida Sang Hyang Widhi Wasa,para Dewa-Dewi,Dewa Pitara miwah sahananing sane mahurip ring jagate. Punika taler palinggih Padma waluya piranti bhakti ring Sang Hyang Widhi ,palinggih Kamulan Taksu waluya sarana bhakti ring Dewa Pitara utawi Leluhur sane sampun suci.

Banten Rsi Gana waluya piranti bhakti ring Bhetara Gana,teler ring karang umah punika wenten wates sane ketah kewastanin   panyengker ,sane ring bucu-bucu pamekas kewangun Padu Raksa, minekadi sane magenah ring kaler kangin wantah genah Sang Raksa,prebawan Ida Bhetari Sri,sane ring kelod kangin wantah genah Sang Aji Raksa,prebawan Ida Bhetara Guru,sane ring kelod kauh linggih Sang Rudra Raksa prebawan Ida Bhetara Rudra miwah sane ring kaja kauh linggih Sang Kala Raksa wantah prebawan Ida Bhetari Uma.

Manut Lontar Asta Kosala Kosali,genah inucap patut keupacarain mangda maurip ngeraksa paumahan pinika. Ring lontar punika munggah ‘aywua nora padu raksa bilang jungut,yan tan mangkana,hala pinanggih sang maumah mabuwat’  artosnyane sampunang pisan nenten nangun padu raksa sabilang bucu karang paumahan,yening nenten asapunika sengkala jagi kepangguh sang anuwe umah.

Mangda adung sekala kelawan niskala mangdane kekaryaning upacara pangurip padu raksa,melarapan piranti pengisin paduraksa,mangda kewentenan umahe punika,setata keraksa sekala muang niskala. Padu Raksa punika waluya padu Bhetara Gana miwah Bhetara Kala sane wenang ngeraksa umah anake meagama Hindu ring Bali. Padu Raksa punika waluya karya sane adung sekala kelawan niskala.

Suksman Padu Raksa sabilang bucu utawi sabilang jungut punika,waluya panuntun idep mangda yatna sekala niskala,nenten melaksana iwang utawi sane kaon utawi iwang sane metu saking padewekan.

Ring lontar Canakya Niti kasurat ‘Jagrata nasty bhayam’ artosnyane yening iraga sampun yatna makta angga,sinah doh rasane katiban bhaya,nika wantah suksman nanem banten Rsi Gana ring natar,elingang nangun Padu Raksa ring pekarangan punika taler ring angga sarira,pastika yan sampun kepadu raksan iraga,yatna,eling lan setata padu sekala niskala pastika sang durjana nenten presida nyengkalen padewekane (IKW/BP,Mg;19042015/8/Manixs)