NAPI MAWINAN PANUNGGUN KARANG MAGENAH RING BUCU KALER KAUH ?

Manut Lontar Asta Kosala Kosali satunggil karang paumahan krama Hindune ring Bali pastika kewangun palinggih panunggun karang sane magenah ring bucu kaler kauh,napi pinaka dasar ngenahang Panunggun Karang ring bucu kaler kauh ?. Ring lontar punika kasurat ‘Wayabya natar ika,iku panunggun karang paumahan’ artosnyane “ring kaler kauh natar paumahan punika,kewangun palinggih sane kewastanin Panunggun Karang”.

Manut sinalih tunggil satwa indik Sapuh Leger wenten kaceritayang sekadi asapuniki ;

…….. kaceritayang manut lontar Kala Tattwa Ida Bhetara Ciwa mepewarah/mepaica panugrahan ring Bhetara Kala, kalugra  nadah imanusa sane embas ring rahina Tumpek Wayang,….kacerita wenten rare sane mewasta Sang Sudha sane embas ring ibunnyane rikala rahina Saniscara Klion Wayang utawi Tumpek Wayang,mirage ortine punika raris Bhetara Kala nguber sahasa ngepung Sang Sudha jagi ketadah,irika raris Sang Sudha mautsaha melaib nyelametang angga merika meriki mangda nenten ketadah,raris panggihina gesing sane samah,enges lingsehane irika ipun mengkeb nenten kepanggih olih Bhetara Kala. Sang Sudha medue ari mewasta Diah Adnyawati,sane kasih ring rakannyane irika raris Diah Adnyawati tangkil matur nunas prekanti ring Sang Prabhu Mayaspati sane meparab Sang Arjuna Sasrabahu. Waluya sang natha ratu wantah swadarmannyane mapitulung yening wenten kawulannyane keni karebahan utawi sengkala. Sang Arjuna Sasrabahu raris mayuda ring Bhetara Kala,santukan Sang Prabhu Arjuna Sasrabahu punika kalintang sakti mantra guna,kasuwen-suwen Bhetara Kala presida kekaonang nanging nenten kepademang antuk Sang Prabhu Arjuna Sasrabahu .

Bhetara Kala raris kaicen swadarma ngemit karang paumahan,mangda sang sane meneng ring karang inucap presida trepti. Sang Prabhu Arjuna Sasrabahu mepewarah-warah asapuniki; …’duh Bhetara Kala mangke ring Wayabya ungguhanta,wus kita angrebeda’…artosnyane, duh Bhetara Kala sane mangkin ring kaler kauh genah bhetara, sampunang malih ngardi byuta ring jagate. Irika raris Bhetara Kala ngawit kewastanin Sang Kala Raksa waluya prebawan Bhetari Uma dados padu raksa ring Wayabya utawi kaler kauh saha kalinggihang ring Palinggih sane mewasta palinggih Panunggun Karang,ngamel utawi mimpin Sang Raksa,Sang Aji Raksa muang Sang Rudra Raksa.

     Asapunika indik satwa kawentenan palinggih panunggun karang sane magenah kaler kauh ring karang paumahan krama Hindune ring Bali sane maduwe tatuwek wantah nabdabin urip iragane  mangda prasida ngangge kala utawi waktu sane patut. Niki sinalih tunggil sane kauratiang ring urip puniki manut lontar Wraspati Tattwa 33.

Pustaka Wraspati Tattwa punika taler kasurat,wenten akutus palet sane patut kautsahayang ring kahuripane puniki mangda presida urip bagia utawi sane kewastanin Asta Tusti.

Lelima mewasta Wahya Tusti waluya tetujon urip sekala,luire ; Arjana,Raksana,Sangga,Kasya miwah Himsa. Yening tetiga mewasta Dyatmika Tusti waluya tatujon niskala luire ; Bagia,Kala lan Atmanastuti. Dados Sang Kala Raksa ring panunggun Karang masuksma mangda imanusa presida nabdabin uripnyane stata manut ring pakibeh kalane.Ngiring kraman tityang krama Banjar Adat Tegenan Kelod titenin indike puniki mangda iraga stata eling ring sang Kala/waktu,napi kepatutan utawi swadarman iraga ngupa pira urip ring jagate mangda presida rahayu sareng sami,santi jagatita. (IKW/BPM/260415/VIII/Manixs)