Seka Teruna WERDHI SESANA Br.Adat Tegenan Kelod rahina Redite Klion Sungsang,pinanggal 4 April 2021 dauh 16.00 Wita ngawit margi ring Bale Desa Adat Tegenan ngantos ke setra ngemargiang parikrama mereresik sajeroning nyanggra rahina suci Galungan sane jagi rauh.
Wayan Teguh Pramarta,klian Seka Teruna maosang,indik tetujon ngemargiang kegiatan punika nenten wenten tios wantah nyokong pemargi krama Banjar sajeroning ngemargiang Tri Hita Karana utamanipun ring widang Palemahan,sios ring punika manut dane,mangda generasi muda pinaka penyeledi swadarma ring pakraman kapungkur wekas presida memargi becik lan antar,napi malih desan iraga sering kelintangin tamyu sane gumanti melila cita ring obyek permandian Telaga Surya. Pemargi mereresik puniki taler mendukung Tegenan dados objek wisata tirta. Yening sampun saling mendukung sinah kapungkur polih kontribusi saking kegiatan wisata mewastu krama Tegenan kelod pamekas presida muka lapangan kerja anyar pendukung pariwisata mawinan kasukertan krama sayan nincap.
Parikrama mereresik puniki naler metetujon, ngerumaketang pasawitran pantaraning krama ST.Werdhi Sesana sane anyar wau ngeranjing ring organisasi puniki, manut pamutus paruman sane wau lintang. akeh kramane rauh gumanti tragia nyanggra rahina jagat Galungan ngajegang dharma agama nitenin Tegenan Kelod ngewerdiang sesana sane becik manut tatwa,susila lan upakara pinaka bantang ajaran Agama Hindu.
Ring galahe punika taler kemargiang pengumpulan peturunan manut daging pemutus paruman, sane kemargiang olih Ni Ketut Nita pinaka juru raksa ST.Werdhi Sesana.
Pidabdabe punika taler kesokong olih Klian Banjar Adat Tegenan Kelod lan Klian Banjar Dinas Tegenan antuk pengapti dumogi para yowana Werdhi Sesana presida ngewerdiang sesana sane becik ring sajeroning kahuripan,pamekas manut visi Banjar Adat Tegenan Kelod 'Widya Kertha Mandala' melarapan nincapang kompetensi diri ,antuk :nincapang pendidikan,ketrampilan,ngajegang daging tattwa agama,piteket anak lingsir/tradisi,pastika santi jagatita ring Tegenan kelod pamekas nyane. (manix)
Tidak ada komentar:
Posting Komentar